आषाढी एकादशी २०२३ निमित्त मुख्यमंत्री एकनाथ शिंदे व सौ. लता शिंदे व यांच्या हस्ते श्री. विठ्ठल-रुक्मिणीची शासकीय महापुजा करण्यात आली. यावेळी त्यांचे पुत्र खासदार श्रीकांत शिंदे, मंदिरे समितीचे सहअध्यक्ष गाहिनाथ औसेकर, व इतर सर्व सदस्य उपस्थित होते. आषाढी एकादशीच्या शासकीय महापूजेत सहभागी होण्याचा मान गेवराई (ता. बीड) च्या नवले दाम्पत्याला मिळाला. मुरली भगवान नवले (52) आणि जिजाबाई मुरली नवले (47) यांनी मुख्यमंत्री एकनाथ शिंदे यांच्यासोबत शासकीय महापूजा केली. मानाचे वारकरी यांचा मा.मुख्यमंत्री एकनाथ शिंदे यांच्या हस्ते सत्कार करण्यात आला. त्यांना महाराष्ट्र राज्य मार्ग परिवहन मंडळाच्यावतीने मानाचे वारकरी या नात्याने देण्यात येणाऱ्या एक वर्षाचा मोफत पास मुख्यमंत्री श्री. शिंदे यांच्या हस्ते सुपूर्द करण्यात आला

कार्तिकी एकादशीनिमित्त सोमवारी पहाटे श्री विठ्ठल- रुक्‍मिणीची शासकीय महापूजा उपमुख्यमंत्री अजित पवार आणि त्यांच्या पत्नी सुनेत्रा पवार यांच्या हस्ते करण्यात आली. दर्शन रांगेतील कोंडीबा देवराव टोणगे (वय 58) आणि त्यांच्या पत्नी प्रयागबाई कोंडीबा टोणगे (वय 55, राहणार मु. निळा, पो. सोनखेड, ता. लोहा, जिल्हा नांदेड) या दाम्पत्यास वारकरी प्रतिनिधी म्हणून महापूजेच्या वेळी उपस्थित राहण्याचा मान मिळाला. शेतकरी असलेले हे दाम्पत्य गेली तीस वर्षे सलग पंढरीच्या वारीसाठी येत आहे. महापूजेनंतर मंदिर समितीच्या वतीने उपमुख्यमंत्री अजित पवार, सौ. पवार तसेच वारकरी प्रतिनिधीचा मान मिळालेल्या टोणगे दाम्पत्याचा सत्कार करण्यात आला. याप्रसंगी पालकमंत्री दत्तात्रय भरणे, मंदिर समितीचे सह अध्यक्ष मा. गहिनीनाथ महाराज औसेकर व इतर सर्व सदस्य उपस्थित होते.